Boutèy Kleren'm

encrejournal.blogspot.com

Nan mitan chan kann a yè,
Plante, rekòlte pitimi.
Se la nou kwaze,
Se la ou fè'm depale,
Se la ou fè'm michan,
Se la ou fè'm bòzò.

Anba ponyèt mwen ou kache,
Mwen refize separe'w.
Se ou ki ban'm nan'm
Se ou ki ban'm fan'm.
Ou fè'm kodjòm
Tankou manman tanbou.
Mwen sèmante, ou se medikaman'm.

Kout manchèt, kout pikwa
Pèdi lavi nan lanmò klere'm.
Tèt mwen lou, mwen santi m'ap chavire,
Mwen tonbe radote, mwen tonbe rablabla.
"Ay! Boutèy mwen o,
Tu m'as toupizoup, tu m'as fouke devan.
Tu m'as toufonnen, tu m'as chifonnen".

Je'm pèdi koulè, bav ap koule.
Mwen kilbite, mwen di wi pou non.
Me dan'm, me ran'm.
Pike kole, vole lajan'm.
Mwen bliye non'm, ou fè'm kazwèl.
Mwen tonbe nan won, tonbe atè.
Pyafe, kraze brize ak boutèy kleren'm.

Ke mwen pran pou 10, ke mwen pran pou 15,
Ke'l te boutèy nwè, ke l te jòn,
Ke'l te nan bak, ou l te nan kab,
Li toujou regle zafè'm.
Mwen pa kon'n lanwit ni lajounen
Mwen pa kon'n semèn ni ton nwèl,
Se sèl boutèy kleren'm, mwen konnen.

Boutèy kleren'm, se ou ki koz.
Boutèy lanni'm, se ou ki fè sa.
Boutèy tafya'm, se ou ki fè'm kaladja.
"Ay! boutèy mwen o, tu m'as flanke atè.
Tu fout mwen yon bikòs, yon bigidap, yon pakala.
Tu m'as toufonnen, tu m'as chifonnen.
Pyafe, kraze brize ak boutèy kleren'm".

Par : Delcarme Bolivard

19/03/2017
10 hs 44 (heure locale)