Sa fè'm mal (2)

Aprè gwo chèf meriken an, prezidan Donald Trump, fin ban nou jouman kòm kwa, nou, ayisyen se machann SIDA nan peyi Etazini, nou, se tou "komòd" ak bann peyi Lafrik yo, nan tèt kole ak Salvadò; nan Repiblik dominikèn, majistra "Santiago de Los Caballeros", Abel Martinez, deklare ayisyen endesirab anpil.

Koze Towo meriken an fè plis pale anpil. Nèg ak fanm, tribò pabò, move kon kong, tonbe ekri bèl fraz, pale bèl franse, alòske, koze mouche a ap fè chimen'l, nonm yo bay pou Trump lan ap kontinye kale chèlbè nan gwo kay blach la. Yo pa twò pale sou ka panyòl la, se tankou pawòl la di: "chen ap jape, karavàn lan ap pase."

Sa ki touye'm frèt, e ki fè'm mal plis la, se paske chèf peyan'm (peyi'm) ap rizibye'm ankò. Y'ap fè tiwounou wounou anba chal, pandan se pèp k'ap chèche defann li ak zong, bout koute, elatriye. Mwen konn pouki yo pa di anyen, men mwen pap di li koulye a.

Pou mwen vini pi drèt nan sa k'ap ravaje kè'm nan, se bann koze sou do youn nan setanè nò yo, onorab Nawoon Marcellus. Nan Palman an, eskize'm wi, senatè Wilo, Wilo mwen di'w, byen fò devan kamera laprès, deklare senatè jènjan nou an, Nawoon, kòm senatè ki pi nil nan chanm wo a. Anyen pa janm di sou gwosè jouman sa. Yo fè'm kwè se politik k'ap fèt, donk, tout sa ki sal, santi pise, santi vomisman, tout se politik. Alatray papa!

Doktè Kelly C Bastien rantre tout longè nan pèsonalite onorab nou an, senatè Nawoon Marcellus, kòm kwa, senatè a pa fè filo, vòlò televizyon, detounen gwo magogo lajan; jouk koulye a, yon myoud pa di. Yo fè'm kwè ni doktè a ni onorab la se kabrit tomazo, menm plim menm plimay, se politik k'ap fèt. Sa vle di, denigre yon moun, plimen yon moun langèt deboutonnen, se jwèt, se politik k'ap fèt. A latraka pou politik papa. Sa fout fè'm mal!

Yo fè komisyon nan palman an, nan nivo chanm wo a, youn nan reprezantan moun nan nò yo, senatè Nawoon Marcellus, rive prezidan komisyon zafè letraje, li ranplase senatè Evalière Beauplan. Se bèl kichòy. Gen nèg ak fanm ki pyafe, ki fè fèt, woule atè tankou chini ki tonbe nan mitan sann dife pou nouvèl sa. Ni mwen tou, mw fè yon ti kontan kòm nèg nan nò.

Men, s'ak fè'm mal la, se defansè moun mari yo mouri ak ti moun ki pèdi manman yo ak papa yo, mèt André Michel, ki deklare nan "radio Mega ( 103.7 FM)" ke sèl yon peyi ki dirije ak "kokorat" k'ap mete yon moun tankou onorab senatè Nawoon Marcellus, kòm prezidan komisyon zafè letraje. Kidonk, prezidan ak tout premye minis la se kokorat? Depite ak senatè yo tou, se yon bann kokorat? Minis yo, pakèt direktè yo, tout se kokorat? Elatriye. Sa fè'm mal. Anyen pa janm di nan sa. Yo vle fè'm kwè se politik k'ap fèt.

Alò, se mo santi fò ki fè politik? Pa di'm se konsa li ye pa bò isit, kidonk, Ayiti pa yon peyi? Pa gen moun k'ap ni panse ni reflechi? Nou vle fè'm pè politik paske mwen p'ap rantre nan zafè manman nou? E pouki nou fache lè prezidan meriken an kalifye nou "tou dèyè, tou komòd ak tou kaka"? Se politik k'ap fèt. Sa fè'm mal.

Delcarme Bolivard

db

19/01/2018