16 Desanm 1990

encrejournal.blogspot.com

Mwen sonje 16 Desanm 1990 wi tonnè ! Nou tchitchile yo nan elksyon onèt ak demokratik. Yon ribanbèl moun desann tout jounen al tranpe dwèt yo nan lank liberasyon peyi a, yo makonnen ak konsyans, diyite, sèmante 7 fwa 77 fwa 7 fwa ke yo bouke ak rejim sanguinè, san manman bout di ki tap woule kòl, Mennen peyi a nan bafon depi lè Wa te kaporal.

Se desisyon yon pèp ki fè listwa, ki swete granmoun pou tèt li, ki tap bouyonnen nan nanm chak èt vivan ayisyen; yon volim lespwa ak kouray nan travay pou ogmante ou kontinye chante Grandèt zanzèt nou yo. Se lespwa ki tap boujonnen nan kannistè rèv tout si la yo kite san pè, san krent goumen pou bay nasyon si la yon lòt libète.

Pèp la leve kanpe, li di non ak tout avadra ki anpeche pitit soyèt yo omwen jwi yon ti privilèj lanmou ak richès isiba. Pèp la deside pou yo voye monte yon Lide ki tap gèmen depi dikdantan nan zantray popilasyon an, yo goumen aprè yon bon bout tan esklavay modèn, pikan anba pye, chèn nan sèvo, pou yo te kap reyisi gwosè rèv sa.

16 Desanm 1990, se dat sa nèg gwo palto, gwo zotobwe, pèdi tout repitasyon malfesan, ti zon, grenn sonnen, anba pye yon pèp ki déjà fe listwa, brav tankou sam pa konnen, tankou sa nou paka repete. Se nan dat sa, paj istwa peyi sa tounen lanvè pou bay yon repons san parèy ak rejim bout di ki tap mennen peyi a depi plis pase yon demi syèk. Dat sa, dat sa, li sanble ak wout ke twa wa maj yo te pase pou yo tal benyen Jezi ti lèzany lan ak lansan yon manyè pou yo di l’ se Wa kap sove limanite.

Se vre nou tout dakò, demokrasi yon peyi pa pran yon sèl kou. Men, li pa bezwen ni 200 an ni yon syèk poul boujonnen anba zye ak kouray yon pèp ki swaf bèl moman sa nan lavi l’. Demokrasi pa fèt sèlman pou nèg gwo palto ki finn kwè  yo se Bondye, pandan yo bliye, tout moun se moun. Li pa fèt non plis nan bouch ak gwo diskou an frese, angle, panyòl ak yon bann lòt lang ankò. Li pa vann, li pa ahtab ni li pa bayab. Se konsyans ak respè la lwa nan lanmou youn pou lòt ki bay nesans demokrasi nan yon peyi.

Si 16 Desanm 1990 se yon eritaj pou pèp kolboso, pèp ayisyen sa, 30 Septanm 1991, se lanfè sou la tè nan mitan chak grenn sitwayen ayisyen. Se zanmi lwen lajan sere, zanmi pwe kouto debò. Se triyay verite nan mitan kafou zonbi fèy ; zonbi san sèl, zonbi ki gen fyèl.

Se nan mannigans woule nan labou fè nwè nou bliye sa nou ye. Se nan ribanbèl fyèl pete nou bliye sann pote. Nou se pèp ki fè listwa, ki ede lot pèp fè listwa. Nou se kouray kap lite, fè jefò poun viv tankou tout mou nap viv byen sou la tè beni. Nou se yo, men yo sanble pan nou. Ki fè, yo panse yo gen pi bèl po pase nou, san yo wouj, san nou nwè.

Men devan lalwa nou tout gen menm dwa, devan lajistis nou tout gen menm kris, devan lanmò nou tout sanble, devan lavi nou tout gen menm souf.

16/12/2013

B.D.