‘’NOU BOUKE, WI NOU FOUT BOUKE’’

encrejournal.blogspot.com

Pèp ayisyen, pèp ayisyen, leve kanpe.

Nan tout erè pèp sa fè nan sa ki gen awè ak politik de grenn gòch baze sou yon lide enperyalis gwo potanta yo, lane 2011 se youn nan ane pèp ayisyen an pa dwe janm bliye  nan listwa'l. Nan eleksyon pikekole ak yon pakèt kandida vye bout mamit, machann peyi, visye san koutcha, restavèk mouche blan, anpil demagoji te sikike anba je ti pèp ayisyen an ki pa't konnen sa pou'l te fè.

Bann kandida malonèt sa yo, meprize sa nou ye ak yon bann fo pwomès malonèt ki fè'n toujou sanble ak chikata nan zafè devlòpman. Men se konsekans move manyè fonksyònman klas politik bout manchèt la ki koz yon nonm ki pa menm konn koulè pou'l pote sou sèn politik la, ki pase tout tan'l ap fè tout sa'n konnen yo deja, rive sou pouvwa peyi Desalin sa. Yon pakèt dwat e gòch, pawòl san nanm pwononse nan bouch medyòk yo, madichonnen bout tè sa pou li yon bann san te koule.

Yo refize kwè jodia, ti pwojè san nanm, malfezan, tèt anba paka devlope yon peyi. Se pou tèt sa estrikti ekonomik yo, dwe makònen ak politik la pou pèmèt gen s'ak rele devlòpman dirab kap kontribye nan pouse do peyi a nan yon demen miyò. Gouvènman chifonnen sa, restavèk desizyon bann san manman enperyalis yo, bliye tout reyalite kouman yon pèp dwe viv, kouman kondisyon vi yon pèp depann an kantite sou kouman si la yo ki gen pouvwa a ap mennen bak peyi a. Yo bliye si enterè pèp ayisyen an, avni yo kondisyone ak jan y'ap mennen peyi a.

Minista ak taye banda, vòlè piyajè machann peyi yo fin wè mò nan danse kole pou viza ak patans pou yo, pitit yo ak mouche oubyen madanm yo. Yo bliye gwoup sa kite al pote kole ak yo nan eleksyon seleksyon an. Yo met pye sou kou yo, kraze kay yo, san dedomajman, san avètisman. Yo achete konsyans ak moral si la yo ki pi fèb yo nan ba yo ti manje, ti lajan sou pretèks y'ap ede yo, pandan y'ap tann pyèj ak zèpèlen pou yo; podyab yo pa gen je pou wè sa.

Lajistis ap vann nan gwo gòdèt, ranmase moun gran jounen fin wè mò, pandan yon bann palmantè ki pa konn ni li ni ekri ap fè lalwa pou pòch yo ak fanmi yo. Pitit sòyèt ap mouri nan prizon san jije, fanm ak gason vanyan fin pèdi kouray nan faktori mouche gran don, gran nèg tradisyonèl pa bò isit sou yon kondisyon lavi chifonnen. Ensekirite sosyal ap vale tèren pandan sanginè, san manman sa yo ap fè konplo sou do pitit pèp la. Kisa nou di nan sa?

Kisa nou di sou lokipasyon minista, sou manda yo ki pa janm bout nan peyi a? Kisa nou di sou edikasyon pèpè yap ofri pitit nou yo, tandiske, pa yo lòt bò ap pran bon jan pen lenkskripsyon ? Kisa nou di sou kondisyon bann moun k'ap peri nan prizon yo ki pa janm jije ? Kisa nou di ak dominiken kap toupizoup frè ak sè nou yo lòt bò fontyè a ? Kisa nou di sou bann dilatwa palmantè zagribay yo ap fè sou do pèp la ? Kisa nou di sou la vi chè a k'ap vale tèren de jou an jou? Kisa nou di sou kondisyon n'ap viv la ? Kisa nou di sou demokrasi rasi ki gen gou rak sa y'ap fòse'n bwè e aksèpte chak jou ki fè jou ? Kisa nou di sou lespri konstitisyon amande a ki pa janm respèkte a ? Kisa nou di apre 5 lane tranblemantè a ki kite fanmi nou zanmi nou anba tant toujou ? Kisa nou di sou zafè taks koupe kè yo reklame nan men pèp ayisyen an ? Kisa nou di sou kòb y'ap vole nan men nou k'ap soti lòt bò dlo a ? Kisa nou di sou taks fòje yap pran sou apèl telefòn yo ? KISA NOU DI ? KISA NOU DI NAN TOUT SA YO AK YON PAKÈT LOT ANKÒ ?

NOU BOUKE ! NOU BOUKE  ak bann machann peyi sa yo. Nou bouke ak politichen san nanm, san moral, san diyite sa yo. Se pou tèt sa, nou mande: Atizan, peyizan, profesè, elèv, inivèsitè, nèg lavil, nèg andeyò, ti machann, gwo machann, poun ini nou nan yon sèl vwa pou'n di NOU BOUKE, wi NOU FOUT BOUKE ak rejim sanginè sa ki dwe bay talan'l san kondisyon.

 

Nòt sa soti anba kout plim groupman sa yo:

Tèt Ansanm poun Sove Ayiti (TASA), Zafè Peyim se Zafè Pam (ZPZP), Asosiyasyon Jenès Kapayisyen pou yon Ayi Djanm (AKAD) ak yon pakèt lòt ankò.

 

10 Janvye 2015, Ayiti.