Ayiti-korespondans

                                                                                                    Kap-Ayisyen, Vètyè, 4 Janvye 2017

Boliva Dèlkam ekri
Lama Jenps (Pari, Frans)

Mouche Lama,
Se ak anpil kè kontan nan non nanchon an mw sot li kòkenn chenn lide ou ekri pou presidan peyi a ki moute tou nèf, ekselans li msye Jovnèl Moyiz. Bwavo koumandan, save, nèg kap li nan gwo liv.

Se menm kè kase mw gen ak ou pou 58 ème prezidan Repiblik gwo ponyèt sa kap pase tray depi jou fè jou.

Peyi a santi di, pèp la ap toufonnen anba grangou, zak kriminèl fè mikalaw, jenès la vire do bay lanmizè pou yal tchitchile lakay blan je vèt.

Mw dakò pou msye Jovnèl Moyiz paske se pèp la ki di wi, pawòl la di : "lè pèp la pale, se Bon Dye ki pale". Men se pou jennonm ki fenk eli a konnen se moun li vin sèvi tankou jan manman lwa peyi a dil, men se pa banmbile li vin banmbile ak fanmi, ti zanmim, sitou ak moun san cheve yo.

Nap fè l konnen tou bannann nan dwe boujonnen tout kote san li pa sèvi enstriman pou vire lòlòj pèp sa ki deja ap beyen nan bafon sa li pa konprann.

Men pou mannyè sove peyi sa, se pou nou tout rantre nan won san baton, chita pale menm lang paske zantray nou makonnen ak menm reyalite nèg dafrik, dosou dosa, marasa, nèg nago, nèg ibo, pito nou la na travay poun bati lekòl, konstri wout elatriye.

Mwen salouwe msye prezidan an e mw tou di li : " Ti bourik fè pitit li se pou dol ka poze".

4 Janvye

4h 55 nan apre midi. Lè peyi Dayiti.

Msye Boliva Dèlkam depi Vètyè, Ayiti Toma.

Responsa kominikasyon nan
www.ulh.edu.ht
Direktè / Fondatè NESA
( Www.encrejournal.blogspot.com )