Lèt yon ti Ayisyèn pou papa'l

encrejournal

Chè papa,

Wa va eskize'm si nan ti lèt sa mwen pa mete adrès ou, ni mwen pa site non'w. Manman'm te toujou di'm, aprè'w te fin mete'm nan vant li ou te sèmante pou'l pat janm site non'w, sinon, ou t'ap touye'l tankou'w te fè pou vwazin nan, dèfen Tifanm. Mwen pa konnen adrès ou, paske kèk fwa Manman'm di ou nan prizon, ou mouri nan lanmè, kèk fwa li di'm ou pa twò lwen. Men, jamè di'm kote'w rete tout bon. Li toujou pè'w. Manman'm te toujou di li gen pou'l di'm non'w ak adrès ou jis lè'm gran, m'ap tann pou'm wè kiyès l'ap di'm.

Chè papa,

Yo di'w byen konnen'm. Moun nan zòn nan di, mwen byen sanble ak ou. Yo di ni mwen ni ou, nou mache, nou pale menm jan. Mwen gen yon ti siy nan kòm, nan yon zòn sekrè; Manman'm di'm ou genyen'l tou. Men yon jou, fòk sa verifye.

Yo di'm w'ap travay san touche, men bò isit, Manman'm pa janm konn fòs kouray li, se grangou ki fanmi nou. Yo di'm w'ap dòmi nan yon kay kraze, lènmi lapli, pou Manman'm ak mwen se moun ki ba nou ladòmi, toutan'l pa minwi nou paka dòmi. Nou sal kon peny tidan, se mouch ki zanmi nou, se ravèt ki fanmi nou.

Papa, yo di'm ou fè prizon paske'w t'ap pale koze chanjman. Men, èske'w te konnen Manman'm pran jouman chak jou nan men vwazinay pou 5 goud, 10 goud kredi? Pa, mwen pa lekòl non. Vye sandal mwen te genyen an, fin chire, paske se li ki wetan'm, se li ki metan'm. Li twò piti, men se li mwen mete chak jou wi, pa. Mwen pa gen rad, mwen pa gen manje, sèl lanmizè ki kouvri'm.

Chè papa,

Bò lakay la, lòdjou, yo met men sou mwen, yo fè kadejak sou mwen. Lè Manman'm al Tribinal, se li yo bay tò. Yo di nou ti grangou, moun sal, enferyè. Ti frè'm ou te kite nan men Manman'm nan, mouri nan lanmè nan al chèche lavi miyò nan lòt peyi.

Papa, si'w genyen yon jou wa voye yon ti mennen pou mwen ka rezoud kèk pwoblèm. 

Chè papa, mwen p'ap kenbe'w plis. Men, mwen vle di'w ke nou bouke ak soufrans lavi a. Manman'm fin vye ak dlo nan je. Nou bouke. Yon sèl bagay ki fè'm pi mal, se paske'm pa kon ni ki jou ni ki lè w'ap jwenn ak li ti lèt sa.

Siyen....

Delcarme BOLIVARD

25/06/2019
Kredi foto : google, konsilte 24 jen 2019 bò 8 è 10